ఓరి భగవంతుడా!

 

అప్పుడు

వాడూ మరొకడు

తనను మట్టి మీద

వెల్లకిలా పడ దోసి

రేప్ చేద్దామా అంతకన్న ఘోరం

ఇంకేమయినా చేద్దామా అని

తీరిగ్గా మాట్లాడుకునే మాటలు వింటూ

అప్పుడు

ఆ అమ్మాయి

ఏమనుకుని ఉంటుంది?

ఉట్టి గాయం అయితే

బాగుణ్ను అది నిత్య

పరిచితమే

ఆత్మ మీద

పదే పదే

మృగ ఖడ్గాల దాడి;

లేదు ఎంత పల్చనిదయినా

ఉల్లిపొర వంటిదైనా, డాలు

మాంసం ముద్దలైన

నాన్న కోసం,

అన్న కోసం ఏడుస్తుందా

త్రిశూలానికి గుచ్చి

ఎత్తబడే తన

మర్మావయాన్ని

కప్పడానికి

చాచలేపోయిన చేతుల

నిస్సహాయతను నిందిస్తుందా

అప్పుడు

ఆ అమ్మాయి ఏమి

ఆలోచించి ఉంటుంది?

చివరాఖరి ఊపిరితో

ఏ దేశాన్ని ఎలా

శపించి ఉంటుంది?

ఏ తెగను ఎలా

అసహ్యించుకుని ఉంటుంది?

ఓరి భగ...వంతుడా

నీకూ ఉందట కదా భగం

నిన్నెప్పుడైనా అలా వాళ్లు

మానభంగం చేశార్రా

నీకు తెలుసట్రా

ఆ గాయం నొప్పి?

జులై 21, 2023