Saturday, June 19, 2021

పంకజ గీతం

(పాత పాట‍లు: ఈ బ్లాగులో కొత్త పద్యాలతో పాటు, అప్పుడప్పుడు ఎప్పటివో పాతవీ ఉంటాయి. అప్పుడిలా రాశానని చెప్పడానికి కాదివి. అప్పటికీ ఇప్పటికీ నా భావోద్వేగాలలో, పరిసరాలలో మౌలిక మార్పు లేదని చెప్పడానికి కూడా. మారిందేమైనా ఉంటే, 'పాలకుల' కుయుక్తులే. వాటికి దీటుగా పాలితుల యుక్తి, ఉక్తి కొంత మారాలంతే. బ్లాగులో ఈ రకం పొలిటికో లిటరరీ విమర్శ కూడా చేద్దాం... మీరు ఫాలో అయితే సంతోషం). 


బురద బురద బురద

మోకాటి లోతు బురద

డొంకల్లో పొలాల్లో కాదు

నట్టనడి ఊళ్లో నిండు జనాల్లో


నడుస్తుంటే

మొగమంతా చిట్లుతోంది

రెటీనా మీద సుడులు తిరిగి

కపాలం లోనికి దిగుతోంది

లోలోపల పేరుకుంటోంది

 

పెల్లుబికే ఆలోచనల కెరటాల మీద చూడు

మరకలు మరకలుగా బురద

పొద్దున్నే కళ్ల తలుపులు తీసి చూడు

నిద్రలో స్నానం చేసిన శుభ్రమంతా

ఎగిరిపోయేట్టు చిత చిత బురద 

 

ఆయన నమస్కారమండీ అంటాలడు

ఆయన పెదిమల మీద బురద

ఆమె నువ్వంటే నువ్వంటే ఇష్టం అంటుంది

ఆమె ఇష్టం నిండా బురద

 

ఇంట్లోకి గిరవాటేసిన

వార్తాపత్రిక అక్షరాల్ని అలికేసిన బురద

ఆఫీసు టేబుల్ కింద

గోడ మీద గడియారం ముళ్ల మీద బురద

 

సమర్పించుకుంటూ తలొంచుకున్న

పెళ్లి కూతరు కట్టిన పట్టు చీర మీద బురద

తన మెడలో బంగారంలా మెరుస్తోంది బురద

 

అ పొడుగాటి తెల్ల లాల్చీ చింపి చూడు

పొట్ట, గుండె, చేతులు, నిలువెల్ల బురద

బురద హోల్ సేల్ వ్యాపారి వీడే కదా

 

ఎవరి బురద దుర్గం వాళ్ల స్వర్గం

స్వర్గ వృత్తాల్లోకి కాలు పెడితివా

బురద గోళ్లతోనే బురద పళ్లతోనే

రక్కుతారు కొరుకుతారు

గాట్లు కనిపించకుండానే గాయాలు సెఫ్టిక్ అవుతాయి

కప్పల్లా అరుస్తారు శబ్దమంటేనే అసయ్యమేస్తుందిక

 

అయ్యా త్వరగా మేలుకోండి

రండయ్యా బాబూ రండి

మన గుండెల కుండలు ఖాళీ అయినా పరవాలేదు

నదులమై వరదలమై జలపాతాలమై

ప్రవహిద్దాం పొర్లుదాం ఎగిరి దూకుదాం

 

 నదులన్నీ కలిసి సముద్రమవుదాం

జలప్రళయ నాట్యం చేద్దాం

బురద నుండి భూమిని విముక్తి చేద్దాం

('లావా' PAGE: 49; [1984])

పంకజ గీతం

(పాత పాట‍లు: ఈ బ్లాగులో కొత్త పద్యాలతో పాటు, అప్పుడప్పుడు ఎప్పటివో పాతవీ ఉంటాయి. అప్పుడిలా రాశానని చెప్పడానికి కాదివి. అప్పటికీ ఇప్పటికీ నా ...