అసలు విషాదం మనమే: మీరేమంటారూ 6

 

మణిపూర్ ఘటన సందర్భంగా పార్లమెంటులో అవిశ్వాస తీర్మానం మీద ఆయా పార్టీల వైఖరిపై నేను వెలిబుచ్చిన అభిప్రాయం వద్ద మితృల వ్యాఖ్యానాలన్నీ చూశాక ఒక మాట చెప్పాలనిపించింది.

రాష్ట్రంలో వైసిపి, జగన్ వొద్దనుకుంటే మన దగ్గరున్న ఆల్టర్నేటివ్‌ ఏమిటి? తెలుగుదేశమా? పవన్ కల్యాణా? సిపిఐ నారాయణా? సిపిఎం పార్టీనా? ఏదీ లేదు.

ఇక్కడ నా ఖండన మణిపూర్ స్త్రీలపై జరిగిన ఘోరకలికి, మారణహోమానికి పరిమితం. రాజకీయంగా ఎంత తప్పనిసరి పరిస్థితి అయినప్పటికీ, ఇది జగన్ కు మచ్చగానే మిగుల్తుంది అని నా అభిప్రాయం. దాదాపు ఆత్మహత్య వంటిదే అయినప్పటికీ జగన్ అవిశ్వాస తీర్మానాన్ని సమర్థించే సాహసం చేయాల్సింది అని నా అభిప్రాయం.

ఈ చర్చ మిగతా రాజకీయ 'చెద'రంగానికి సంబంధించి కాదు. ఆ చెదలులో మనం కూడా ఉన్నాం. ప్రత్యామ్నాయం సృష్టించడానికి ఏమీ చేయ(లే)ని మనం కూడా ఆ చెదలులో ఉన్నాం.

*

బూర్జువా పార్టీలనుంచి బుర్జువా డెమోక్రసీ డిమాండ్ చేయాలి: మీరేమంటారూ 5

మీరేమంటారూ?

    నా ఫేస్ బుక్ మితృలు మితృలు తిరుపాలు పూసలపాటి ఇలా అన్నారు:

"(జగన్ ప్రభుత్వం మీద) మీది భ్రమ అందామా? ఆశావాదం అందామా? మొదటి నుండి మీరు సానుభూతి చూపిస్తునే ఉన్నారు. సానుభూతి చూపించడం లో తప్పు లేదు. మీలాంటి అనుభవజ్ఞులు చూపించటం ధర్మం కాదు. ఇప్పుడు ఉన్న రాజకీయ పార్టీలు ఏ పార్టీ ప్రభుత్వంలో ఉన్న పెద్ద మార్పులు ఏమి ఉండవు. ఒక సన్నని గీత తప్ప!

తిరుపాలు గారి మాట చాల ఆలోచనీయం. ఇది ఆయన ఒక్కరి మాట కాదు. పాలక పార్టీలలో ఏ ఒక్కదానికైనా అనుకూలమైన మాట వినిపిస్తే చాలు, ఇలాంటి మందలింపులు ఎదురవుతాయి. ఈ మందలింపులు సరైనవేనా? చాల మంది స్నేహితులు ఇలాగే ఆలోచిస్తున్నారు. ఇది సరైన ఆలోచనేనా?

తిరుపాలు గారూ! మరి, ప్రజల మేలు కోరే వాళ్లం ఇవి కాకుండా మరి ఏ పార్టీల మీద ఆధారపడదామంటారు? పాతికో యాభయ్యో అయిపోయిన కమ్యూనిస్టు పార్టీల మీదనా? సాధ్యమా? లాబీయిస్టు సమూహాలుగా, కుల కూపాలుగా మిగిలిపోయిన వాళ్ల మీదనా?

నా మట్టుకు నేను ఇప్పుడు ప్రజా జీవితంలో మెరుగుదల కోసం కమ్యూనిస్టుల మీద ఆధారపడడం సాధ్యం కాదని అనుకుంటున్నాను. సాధ్యమైతే బాగుణ్ను కాని, సాధ్యం కాదు.

ఒక్కుమ్మడి మార్పులతో కూడిన విప్లవాలు జరిగేట్టు ఉంటే, అవి జరగడానికి దశాబ్దాలు, శతాబ్దాలు పట్టగూడదు. ఈలోగా ప్రజా జీవితం సంగతేమిటి? సాయుధ పోరాటం వంటి నినాదాలు సఫలమై ప్రజల చేతికి అధికారం వచ్చే దాక చుట్టూరా కనిపించే ప్రజా సమస్యలు ప్రజలను హింసించక మానవు. కూటికి లేక వలసపోయే నిరుపేదల దుఃఖం అగదు. అందువల్ల, ఉన్న రాజకీయ ఏర్పాట్లతోనే ప్రజా జీవితాల్ని మెరుగుపరుచుకోవాలని నేను భావిస్తున్నాను. జీవితాల మెరుగుదల క్రమంలోనే, దాని కోసం చేసే పోరాటాల క్రమంలోనే ప్రజలు పురోగమిస్తారని, దోపిడి వ్వవస్థ ఆ సమస్యలను తీర్చలేక వరుస సంక్షోభాలకు గురై... జనం కూలదోస్తే కూలిపోతుందని నేను అనకుంటున్నాను.

మరలాంటప్పుడు, ఇప్పటికిప్పుడు ప్రజలకు మరింత మెరుగైన జీవితాల్ని డిమాండ్ చేయాలా వద్దా మనం? ఎవరిని డిమాండ్ చేయాలి? బూర్జువా పార్టీల నుండి బుర్జువా ప్రజాస్వామ్యాన్ని డిమాండ్ చేయాలని నా అభిప్రాయం. కులాలు, మతాలతో ప్రమేయం లేని ప్రజానుకూల పాలనలను డిమాండ్ చేయాలి అని నా అభిప్రాయం. ఆ డిమాండ్లకు సానుకూలంగా స్పందిస్తే ఆ ప్రభుత్వాలు ఉంటాయి. లేకపోతే ఊడుతాయి. అలాంటి త్రెట్ ఎప్పుడూ రాజ్యానికి ఉండాలి.

ఈ అర్థంలోనే... ప్రజల డిమాండ్లకు స్పందించడం అనే అర్థంలేనే... నేను ఆంధ్ర ప్రదేశ్ లో వైసిపి ప్రభుత్వానికి ప్రత్యామ్నాయం చూడలేకపోతున్నానని అన్నాను. చూడలేకపోతున్నాను కూడా. మీకు అలాంటి ప్రత్యామ్నాయం కనిపిస్తే చెప్పండి. మన మితృలు కొందరికి... రాష్ట్రంలో 'తెలుగుదేశం' పార్టీ అలాంటి ప్రత్యామ్నాయంగా, కనిపించింది.

మరి, మీకు? మీకు కనిపిస్తున్న ప్రత్యామ్నాయం ఏమిటి?

ఇది సీరియస్ ప్రశ్న. సూటిగా సుత్తి లేకుండా మాట్లాడుకుందాం.

కలిసి ఆలోచిద్దాం. మీది నిరాశ అని అనను గాని, ‘ఇప్పుడు ఉన్న రాజకీయ పార్టీలు ఏ పార్టీ ప్రభుత్వంలో ఉన్న పెద్ద మార్పులు ఏమి ఉండవు’ అనేది నిరాశ కాకపోతే ఏమిటి, చెప్పండి?

జులై 27, 2023

ఇప్పటికీ మిగిలిన కులాల మూలాలు: మీరేమంటారూ?

 

 ఆ మధ్య అరిజోనా న్యూ మెక్సికో ప్రాంతాల్లో తిరుగుతూ చాల చోట్ల చూసిన ఒక బోర్డు, కంపెనీ నేమ్ గురించి రాశాను. రెడ్షీ ఐస్ అనే ఆ కంపెనీ నాకు చిత్రమనిపించి మీతో పంచుకున్నాను. దాన్ని చూసినప్పుడు గుర్తుకొచ్చిన దానే మితృడు శివ పేజీలో చూసిన ఈ ఫోటో మళ్లీ గుర్తు చేసింది.

నాకు పట్నం పరిచయమైందే 16 వ ఏడు (ఎస్సెస్సెల్సీ) తరువాత. అలా పరిచయమైన పట్నంలో... దాదాపు ప్రతి పట్నంలో కనిపించిన రెండు బోర్డులు... ఎందుకలా అని నన్ను కాసేపు నిలబెట్టేవి. ఒకటి ‘బ్రాహ్మణ శాకాహార హోటల్’ అనేది. రెండోది ‘రెడ్డి మిలిటరి హోటల్’ అనేది. మిలిటరీ అంటే అక్కడ సైనికులు తింటారని కాదు. మాంసాహార హోటల్ అని దాని అర్థం. మటన్ చికెన్ తో బువ్వ తినాలంటే రెడ్డి లేక రెడ్ల ‘మిలిటరీ’ హోటల్ కే వెళ్లాలి. తరువాతి రోజుల్లో మిలిటరీ తీసేసి రెడ్డి హోటల్ అని రెడ్డి మాంసాహార హోటల్ అని బోర్డులు ఉండేవి.

ఈ రెడ్డికీ మాంసాహారానికీ సంబంధం ఏమిటి?

నాకి ఇలా అనిపిస్తున్నది.

ఒకానొక నాడు రాజుల వద్ద స్థిర సైన్యం అనేది లేదు. ఉన్నా చాల కొద్దిగా ఉండే. పరాయి వాడు డండెత్తి వచ్చినా, తామే దండు పోవాలన్నా అప్పటికప్పుడు సాధారణ ప్రజల నుంచి సైన్యాన్ని మొబిలైజ్ చేసుకోవలసిందే. అలా మొబిలైజ్ చేయబడే వారిలో అత్యధికులు. ఊరి నుంచి మొబిలైజ్ చేసే వారిలో మరింత అధికులు ఆ పనినే వృత్తిగా కలిగి ఉండే వారు. శాంతి కాలంలో ఊరి రక్షణ, ఊరిలో శాంతి భద్రతల వంటి పనులు చూసే వారు. రాజుకు పన్నులూ అవీ వసూలు చేసి ఇచ్చే వారు. అలాంటి స్థానికులనే రెడ్డి అని పిలిచే వారు. మొదట వాళ్లు తక్కువ సంఖ్య అయినా తరువాత... ఆ వృత్తి ‘లాభసాటి’ కావడం వల్ల సంతానోత్పత్తి ఎక్కువగా జరిగి చాల ఎక్కువ మంది అయ్యారు. ఒక కులం అయ్యారు. చాల ఉప కులాలు అయ్యారు. మంది ఎక్కువయ్యే కొద్దీ ఒక చోటి నుంచి ఒక చోటికి వలసలు పోయారు. తమ పూర్వీకులు ఎక్కడి నుంచి వచ్చారో తరువాతి వాళ్లకు తలియనంతగా ఆయా స్థలాల్లో తామర తంపరలయ్యారు. (అలా మరిచిపోబడిన పూర్వీకుల గురించి చెప్పే రెడ్డి శాఖ ఒకటుంది. వాళ్లను పిచ్చికుంట్ల రెడ్లు అంటారు. కర్నూలు దగ్గరి ఓబులాపురం గ్రామం తదితర చోట్లి వీరు ఉన్నారని విన్నాను. వెళ్లి కలుసుకోవాలని ఉంది. బద్ధకం. 😊 )

ఈ వలసలు ఎక్కువగా ఏ ప్రాంతం నుంచి జరిగాయో చెప్పడం కష్టం. విజయ నగర రాజ్య పతనం తరువాత, కాకతీయ రాజ్యపతనం తరువాత విడిపోయి చెల్లా చెదురైన ఆ రకం అస్థిర సైన్యాలే కొన్ని చోట్ల రెడ్లుగా, కొన్ని చోట్ల వెలమలుగా, కాపులుగా, రెడ్లుగా ‘స్థిర’పడ్డారు. అంతెందుకు ఈ నాలుగు గుంపుల సామాన్య నామం కాపు అని నా ఆభిప్రాయం. అలా అనుకోడానికి కారణాలు: 1. చాల చోట్ల ఊళ్లలో ఈ నాలుగు గుపంపుల వాళ్లను... మిగతా ఊరి ‘కాప’దనం అని, కాపులు అని వ్యవహరిస్తుంది. 2. మా ఊళ్లో టీచరుగా వచ్చిన రామకృష్ణను మా ఊళ్లో ఆ చుట్టు పక్కల రామకృష్ణా రెడ్డి అనే వారు. 3. నా ఎస్సెస్సెల్సీ సర్టిఫికెట్ లో జయ, మమత సర్టిఫికెట్లలో కూడా కులం పేరు దగ్గర రెడ్డి అని ఉండదు. కాపు అని ఉంటుంది.

ఎక్కడో చదివాను... విజయనగర రాజ్య చరిత్రకు చెందిన పుస్తకంలో అనుకుంటాను... రెడ్ల వలసలు కోస్తా వైపు నుంచి జరిగాయని. తిరుపతి వేంకటేశ్వరాలయం దేవుడు చుట్టు పక్క రైతులకు వ్యవసాయం పనుల కోసం అప్పులు ఇచ్చే వాడు. ఆ విధంగానే దేవాలయం ప్రసిద్ధమైంది. కృష్ణదేవరాయలు (?) ఆ దేవాలయానికి మాన్యాలు ఇచ్చాడు ఈ పర్పస్ కోసమే అని నేను చదివాను.

శివా! మీ ఫోటో తో ఇన్ని ఆలోచనలు రేపారు. చాల కృతజ్ఙతలు. మీ పోస్టులోని ఫోటల్లో హోటల్ నేమ్ బోర్డు నేరుగా ఉన్నవి కూడా ఉన్నాయి. నేను వాటిని కాకుండా, అద్దంలో ప్రతిబింబంలా అక్షరాలు తిరుగబడిన బోర్డునే ఎంచుకున్నాను. ఇది సకారణం. మన మన గతాలకు సంబంధించిన అవగాహనలు మన మనస్సులలో తిరుగబడి ఉన్నాయి. వాటిని సరిగ్గా చదివి, తప్పొప్పులు సరదిద్దుకుని ఆ అనుభవాల నుంచి ఇప్పటికి తగిన పాఠాలు మాత్రం తీసుకుని, పాత వైషమ్యాలను తుంగలో తొక్కి ముందుకు నడుద్దాం.

 

 

ఇది భిన్నత్వమా తెగలూ కులమతాలకు కాపలాయా?

మీరేమంటారూ? 3

కాసేపటి ముందు మితృడు సురేంద్ర రాజుకూ నాకు మధ్య సంభాషణ. కింది కాపీ లో నా భాషణమే ఎక్కువ . ఇదే వెయిన్ లో, శీను వంటి మరికొందరు స్నేహితులు కూడా నన్ను పోక్ చేసి వుండడం వల్ల నా వ్యాఖ్య కాస్త పొడుగయ్యింది. అయినా బాంటుంది, చదవండి. చదివి, మీరేమంటారో చెప్పండి

Surendra Raju Ambati

వైవిధ్యం / భిన్నత్వం / బహుళత్వం - పైన మీ అసహనం హిందూత్వ అసహనాన్ని మించిపోతున్నది. హ్యాట్సాఫ్ ! కీపిటప్ ... గుడ్ లక్ ...

Hanumantha Reddy Kodidela

థాంక్స్.

నా మీద మీ అసహనం దేన్ని మించి పోయిందో చెప్పలేను.

నా అసహనం భిన్నత్వం మీద కాదు, ఆ పేరుతో బ్రాహ్మణవాదులు పరోక్షంగా బ్రాహ్మణ వాదాన్ని కాపాడడం మీద. తెగలూ కులాల వాదాన్ని కాపాడే యథాతథ వాదం మీద. మీరు అందులోంచి బయటికి రాలేరు. అది మీరు కూర్చున్న కొమ్మ. మీరంటే నాకు ఇష్టం, కాని ఇలాంటి ఇష్టాల కోసం నన్ను నేను వొదులుకోలేను. భిన్నత్వం పేరిట తెగలూ, కులాలతో కూడిన యథాతథ స్థితికి మీ అందరి తెలివైన కాపలాను అంగీకరించలేను. ఈ ఇస్యూలో మనం వ్యతిరేక శిబిరాలలో ఉన్నాం. ఒకే శిబిరంలో ఉన్నట్టు నటన అక్కర్లేదు.

నిజానికి గతంలో కూడా ఇదే నా వైఖరి. అంటే హిందూత్వ అనే పదం పుట్టక ముందు నుంచీ... బీజేపీ ప్రభుత్వంలోకి వస్తుందని అనుకోక ముందు నుంచీ... ఇదే నా వైఖరి. ఇప్పటికీ అదే. గతంలో నేను మంచి వాడినని మీరు భ్రమ పడినట్టున్నారు. మీ ప్రమాణాల ప్రకారం నేను మంచి వాడిని కాను. పేరు హనుమంతుడిదైనా నేను ఆసాంతం అసురుడను. అన్ని రకాలుగా దేవతల వ్యతిరేకిని. అన్ని దేవతల వ్యతిరేకిని. గిరిజన దేవతల వ్యతిరేకిని కూడా.

మా ఊరికి వెళ్లినపప్పుడు వాళ్ల పూజలకు... అవి దాదాపు గిరిజనుల పూజల వంటివే... కూడా వ్యతిరేకిని. ఈ చివరి ఆచరణాత్మక-వ్యతిరేకత వల్ల, ఇంట్లో అందరికీ దూరమై అనుభవించిన (ఇప్పటికీ అనుభవిస్తున్న) నొప్పిని చెబుతూ, గతంలో నా లాంటి వాళ్లది ఒక మైనారిటీ ఘోష అని రాసినందుకు మైనారిటీ మహాకవి ఖాదర్ నా అగ్రవర్ణ దురహంకారాన్ని ఇప్పటికీ క్షమించలేదు.

క్షమించబడాలంటే, నేను ఆయన మతాభినివేశాన్ని... ఇదిగో ఇప్పటి మీ వైవిధ్య భరిత హేతుత్వం సాయంతో... మెచ్చుకుని గౌరవించాలనుకుంటా. అది నాతో అయ్యే పని కాదు. నేను ఏ మతాన్నీ గౌరవించను. సూఫీ అని మెత్తని పేరు పెట్టుకున్న మతాన్ని కూడా గౌరవించను.

ఇప్పుడు మీ వంటి స్నేహితులు నా మీద చూపిస్తున్న పిటీ అప్పుడు ఖాదర్ కలిగించిన నొప్పి వంటిదే అనుకుంటాను సురేంద్రా!

ఈ డైలాగు కొనసాగాలి గాని, 'పిటీ చేయడం' వంటి హైహాండెడ్ నెస్ ను నివారిద్దాం.

హరివిల్లు విరవొద్దని!

 

నువ్వు నమ్మవు గాని, ఆ రోజు పొద్దున్నే

ఒక సీతాకోక చిలుక మా ఇంటి కొచ్చింది

 

పిట్టల కోసం చూరుకు కట్టిన

జొన్న కంకి మీది సుంకు ను పుప్పొడి అనుకుని

పాపం, చాల సేపు అక్కడే తచ్చాడింది

సీతాకోక చిలుక తొడుక్కున్న రంగు బొమ్మల అంగీ చూసి

దానితో మాట్లాడాలని

అప్పుడే పుట్టిన ఒక పిచిక పిల్ల చాల చాల ఆశపడింది

 

సీతాకోక చిలుకకు పక్షుల భాష తెలియదు

అప్పుడే పుట్టిన పిట్టల భాష అసలే తెలీదు

తనకంటూ ఒక  భాష లేదని కూడా, పాపం,

సీతాకోక చిలుక మరిచిపోయింది

నాల్కకు బదులు రెక్కలాడించి

ఆ ఏడాది ఉత్తమ కవితల్లా కంకి సుంకు మీద

కొన్ని నిశ్శబ్ద వర్ణాలు విదిలించి ఎగిరి పోయింది

 

గాలికి లేచిన చప్పుడు లేని రంగులు ఆకాశానికి చేరి,

ఏ సనాతన సౌందర్యానికో పదును బాణం సంధించే

దృశ్యాన్ని  చూశాను

చూరు కింద మంచమేసుకుని కూర్చున్న నేను

 

చూశాను గాని ఏం చేయను,

రైతు నాన్న రెక్కల నీడలో ఊరి వాగు ఇసుకలో

కవిత్వాలు రాసుకుంటున్న వయస్సది,

సీతాకోక చిలుక కాల్పనికతను వదిలి నిజం పువ్వులు వెదుక్కుంటూ

ఎటో ఎగిరిపోయింది, పిచిక పిల్ల కూడా

చూరు పట్టుకుని వేలాడడం లేదిప్పుడు

అసలు, చూరే లేదు

యాస్బెస్టాస్ రేకుల ఇనుప అలల కింద నలిగిపోయిన

పాత పక్షి ఈకల మరకలను వదిలించుకుంటే గాని

నగరం నన్ను అంగీకరించదు, ఇక ఏం చేస్తాను?

ఏదో చేసి ఎట్టాగో ఎగరగలిగినా ఎక్కడికని పోను?

అయినా, నేనేమైనా సీతాకోక చిలుకనా? నవ జాత పిట్ట పిల్లనా?

 

రంగులున్నవో లేనివో

తోలువో ఇనుపవో 

నా రెక్కలతో నేను ఎగురుతాను

అడివి అడివంతా తిరుగుతాను

ఎటు పోయినా ఎంత ఎగిరి చూసినా

చెట్ల కొమ్మల్లోంచి పడిపోయిన పిట్టల గూళ్లు

చెట్ల కింద దేవుళ్లు వేసుకున్న చలిమంటలు

మంటల్లో చిటపటలాడుతూ, పిట్టగూళ్ల పుల్లలు 

 

సీతాకోక చిలుక సరే, మాట్లాడ్డానికి నోరు లేనిది

పిచిక పిల్లలైనా వాళ్ల అమ్మా నాన్నలైనా

నాకు చెప్పాల్సింది

ఆ ఇంటిని, ఇంటి ముందు రెల్లుగడ్డి చూరును,

చూరుకు కట్టిన కొత్త జొన్న కంకులు గాలికి ఊగుతూ చేసే నిశ్శబ్దాలను 

విడిచి వెళ్లొద్దని,

ఇల్లు విడిస్తే పోరు మధ్యలో

విల్లు విడిచిట్లేనని!

 

·       సుంకు: కొత్త జొన్నకంకి మీద రజను వంటి పొడి పదార్థం. కంకిలోని పువ్వులన్నీ గింజలైపోగా మిగిలిన పుష్ప దళాలు అనుకుంటానవి.

+16096472863

 

 May 8, 2023

Sent to AJ (Meher)

మీరేమంటారూ? 4

 

ఇది నా ఫొటోనే. ఇది ఈ ఏడాది మొదట కర్నూలు వెళ్లినప్పుడు వేదిక మీద మాట్లాడుతున్నప్పటిది. ఫేస్ బుక్ ప్రొఫైల్ లో మళ్లీ నా ఫొటోనే పెడదామని, ఉన్నంతలో మోస్ట్ రీసెంట్ అని ఈ ఫొటో పెట్టేను. దీన్ని అప్లోడ్ చేస్తున్నప్పుడు కలిగిన ఆలోచనలు... టూకీగా..

సుమారు మూడేళ్ల కొకసారి తీసుకున్న ఫోటోల్లో తేడా చిత్రం అనిపిస్తున్నది. ఇంతకు ముందు కూడా తేడాలు ఇలాగే కనిపించి ఉంటాయి. అప్పుడు కూడా అనుకుని ఉంటాను. పెద్దాన్నయిపోతున్నానని.

అది కాదు గాని, మూడేండ్ల కొకసారి నేను ‘మునుపటి నేను' కానప్పుడు, అయినా నాతో నేను సర్దుబాటు చేసుకుంటున్నప్పుడు, అంత సామరస్యంగానే, నా పక్క వాడితో నేను ఎందుకు సర్దుకోను? ఎందుకు వాడో నేనో అన్నట్టు పేచీ పడతాను?

నేనంటే నేనే కాదు. నాలోని నేనే కాదు. నీలోని నీ నేను కూడా. తన లోని తన నేను కూడా.

ఏం లేదు. అలాంటి సహనాన్ని అలవర్చుకునే క్రమంలో, నేను నేను మాత్రమే అనే దుర్భావన పోయి, నేనూ నీ లాగే తన లాగే, ‘కమ్ లెటజ్ ఎంజాయ్ అవర్ స్టే హియర్ టుగెదర్’ అనే మంచితనాన్ని మనలో ఒక స్వభావ విశేషంగా అలవర్చుకోవాలి. చిరకాలంగా టూ వీలర్ ఉపయోగించే మనిషి చాల అప్రయత్నంగానే, ప్రమాద-రహితంగా బండి నడుపుతాడు. ఇది ప్రతి టూ వీలర్ సొంతదారుకూ అనభవమే. అలాగే, ఇంటర్నలైజ్డ్ స్వభావంగా మంచితనంతో వ్యవహరించడాన్ని అందరం అలవర్చుకోవాలి. అందుకు ఒకరికొకరం సాయం చేసుకోవాలి, మాట సాయమూ, చేత సాయమూ.

మన విద్యలో, విద్యాత్మక చర్చల్లో కలివిడి బతుకుల గొప్పతనాల్ని ఉగ్గడించే మెకానిజం తప్పకుండా ఉండాలి.

చివరికి మిగిలేది ఏమీ లేదు.

ఈలోగా ఈ దోపిడి వొద్దు. దోపిడి చేసి ఇతర్లకు లేకుండా చేయడం ద్వారా ‘నేను’ ఉన్నోడిని అయిపోవాలనే యావ వొద్దు. చివరికి మిగిలేది ఏమీ లేదు నీక్కూడా. నాక్కూడా. అందుకని,

ఇంకొకర్ని

నయవంచనతోనో, బలవతంగానో

దోచుకునే మానసిక, భౌతిక హైన్యం వొద్దు. ఎందుకంటే, నువ్వు ఏం సంపాదించావో దాన్ని నీ కొడుకు లేదా కూతురు నుండి నీ కన్న తెలివైనవా(వంచకు)డెవడో దోచేసుకోడని గ్యారంటీ ఏమీ లేదు. దానికి గ్యారంటీ ఇవ్వడానికి, వాళ్లను కాపాడ్డానికి నువ్వు ఉండవెలాగూ.

ఏంటి, ఈ మెట్ట వేదాంతం అనిపిస్తోందా? మెట్ట సంగతేమో గాని, రకరకాల పాపాలతో సహజీవనం చేసిన వాళ్లు రకరకాల సద్గురు వేషగాళ్లకు దోచిపెట్టడం కన్న, అలాంటివేమీ అవసరం లేకుండా ఇలా మనలో మనం మాట్లాడుకోడం తప్పు కాదనుకుంటాను. ఇది మెట్ట-వేదాంతం కాదనుకుంటాను. ఇవి రోజువారీ జీవితానికి పనికొచ్చే సంగతులే అనుకుంటాను.

మరి, మీరేమంటారూ?

19

• Like

అతుక్కోకు అదే కీలకం: మీరేమంటారూ? 03

 

To be expanded into an article

 

సెల్ఫ్ అంటే మరేం లేదు. అటాచ్మెంట్.

నా పేరుప్రతిష్టలకు... నా అటాచ్మెంట్

నా దేశానికి నా జాతికి నా అటాచ్మెంట్

బ్యాంకు బ్యాలెన్స్ ఉంచుకో. 'దేశా'న్ని ఉంచుకో, 'జాతి'ని ఉంచుకో

వాటితో నీకు జీవితావసరాలు ఉన్నంత వరకు; వాటికి అతుక్కోకు.

భార్యా బిడ్డలను ఉంచుకో, బాధ్యత వహించు; అతుక్కోకు

ఈ మాటలు ఎవరివో అడక్కు. చెప్పను;

చెబితో ఆతడికి అతుక్కుపోతావు నువ్వు.