Friday, May 18, 2018

23. వివశం



ఒక్కొక్క చినుకై రాలి పోతే బాగుణ్ను రాత్రి
పగిలి గగనమంతా నిండిన చుక్కలయి పోయింది
బయట చెట్లు చేతులూపుతున్నాయి
ఏ సంతోషాలకో వీడ్కోలు చెబుతున్నట్టు


తూనీగలు, సీతాకోక చిలుకలు వాటి రెక్కల కోసం
ఫెన్సింగ్ వెనుక గడ్డిలో వెదుక్కుంటున్నాయి


మళ్లీ బళ్లో తుపాకులు
ఎక్కడో గుడిలో
ఒళ్లంతా పుండై ఆపై తల పగిలిన శైశవ గీతం
వదలరు, వదలరు పసి పిల్లల్ని  


కసి
పెంచండి దాన్నింకా ఇంకా మీ వచో చాత్రుర్యాలతో
వికట నవ్వండి ఆపై, మీ నాగరీకానికి మీరే


తమను తాము కాపాడుకోలేని వాళ్ల కోసం
ఒక డాలరు కాదు కదా, మీ దగ్గరొక్క అశ్రుకణమైనా లేదు


కావాలంటే కొన్ని పద్యాలు చల్లుతారు
మట్టిలో వలలు దాగిన ఎండిన నేల మీద
మనుషులు ఎగిరి పోడానికి వీల్లేకుండా


పైన చూడ్డానికి పూవుల మాలలు
లోన ఇనుప సంకెళ్ళు, తుప్పు పట్టినవి


ఒక్కొక్క చినుకై ఈ రాత్రి రాలి పోయినా బాగుణ్ణు
ఉక్కు శూన్యమై ఆన్ని పక్కలా అదిమి వేస్తున్నది
తనివి తీరా ఏడవడానికి స్థలం లేని దుఃఖమై
ముంచెత్తు తున్నది


18-5-2018

No comments:

Post a Comment