Thursday, January 11, 2018

21. వేషాలు

వురేయ్
నేను చెబుతున్నాను కదా
నేను నీతో లేను
యిదే కాదు,
యింకా పెద్ద గుంటలో కాలు జారి పడినా 
యే బ్రాహ్మణుడికీ కడియం ఆశ చూపను
ఆకలితో దప్పికతో మరణిస్తానేమో గాని 
యిక నిన్ను నమ్మను
అత్యంత అవిశ్వసనీయుడవు నువ్వు
నువ్వు యెన్ని విన్యాసాలైనా చెయ్యి
అచ్చం నా వాడి మాదిరిగా 
యెన్ని వేషాలైనా కట్టు
నా రక్షకుడి వలె 
యెంతగానైనా నటించు
మోసపోను 
యిక నా సేవియర్ ని కేవలం నేనే
నేను మరీ రాటు దేలి వున్నాను
నీ వంచనయే నా ఆకురాయి చక్రం
సెంటిమెంట్ల తుప్పును
నిప్పులు నిప్పులుగా వదిలించుకున్నాను
నన్ను నేను కాల్చుకుంటేనేం
యిప్పుడు
నా కోసం నేను మిగిలి వున్నాను
నువ్వు యెన్ని వేషాలన్నా వెయ్యి
యెన్ని స్తోత్ర పాఠాలైనా వల్లించు
నీ పాఠాల్ని యెంత వున్నత 
సంగీత రీతులతోనైనా దట్టించు
అవి యేవీ యిక పేలవు
నువ్విచ్చే అనాకారి దివ్యత్వం కోసం
నా లోపలి మనిషిని నే వదులుకోను
8-1-2018


No comments:

Post a Comment