Monday, October 16, 2017

6. వెర్రి ప్రశ్న

సైడ్ వాక్ మీద వొక తడిసిన మెత్తని యెండుటాకు
వంటింట్లో దభేళ్మని యేదో పడిపోయిన చప్పుడు
రోడ్డు ములుపులో ఆగిపోయినన గార్బేజ్ ట్రక్కు
యేది మరిచిపోయానో మరిచిపోయిన జ్ఞాపకం
క్రిస్మస్ చెట్టు మీద కదిలీ కదలని యెండ పొడ
సోఫాలో నిన్న రాత్రి చదవబడలేకపోయిన పుస్తకం
యెట్నించి యెటో దొర్లుతూ ఆగిన వొక గోలీకాయ
గోడ మీద వొక పేద్ద మంచు ముద్ద నుంచి జారి
సముద్రంలోనికి పడిపోతున్న నీటిబొట్టులా దేశపటం
కిటికీకి కన్నై బయటికి చూస్తున్న మనీప్లాంటు
పియానో మెట్ల మీద పిల్లి నడిచిన శబ్దాలు, అవి
సంగీతం యెందుక్కాదని లోలోపల వెర్రి ప్రశ్న...
16-102017

No comments:

Post a Comment