Monday, October 16, 2017

5. కుక్కపిల్ల

పక్కింటామె 
మళ్లీ కుక్క పిల్లను తెచ్చుకుంది
వారం రోజులయ్యింది
ఆమె కుక్క పిల్ల మరణించింది
ఆమె వొంటరి అయిపోయింది
పొద్దునా సాయంత్రం
దిగులుగా వొక్కతె
యింటి తలుపులు తీయడం మూయడం
వొక్కతె కాసేపు గడ్డిలో నెమ్మదిగా నడవడం
మరేం ఫరవాలేదన్నట్టు బాధగా నవ్వడం
కొత్త కుక్కపిల్ల బాగుంది
ఆమె యింటికి రాగానే
కాళ్ల వద్ద తచ్చాడుతుంది
వొళ్లోకి దూకుతుంది
యిది కూడా బుగ్గలు నాకుతుంది
తలుపులు మూసినప్పుడు తెరిచినప్పుడు
తానే ముందుగా వెళ్లాలని వురుకుతుంది
చెరువు వొడ్డున కాళ్లు బారజాపి కూర్చుంటే
వొక అల వచ్చి వెళ్లాక మరొక దాని కోసం
పాదాలు యెదురు చూస్తాయి
మరో అల రావడం ఆలస్యమయితే మన
ఆలోచన మన పాదాల వద్ద తారాడుతుంది
కుక్క పిల్లలు కూడా అంతేనా? మనుషులు?
అంతా చెరువు నీళ్లేనా? నీళ్ల మీది అలలేనా?
15-10-2017

No comments:

Post a Comment