Monday, October 16, 2017

3. రేపు

 యేదో మొలకెత్తుతోంది
మొలకెత్తడానిక్కొంచెం భయపడుతోంది
మొతకెత్తాలా అని సందేహపడుతోంది
నేల మీద చలి చలి యీదురు గాలి
చిన్ని ప్రాణాన్ని వొణికిస్తోంది
అంతకు ముందు వురుకులు పరుగులై
వెళ్లిన వరద దాన్ని వూడ్చేయబోయింది
చెట్టు మీంచి వొక పల్చని రెక్కల పిట్టపిల్ల
నీకేం భయం లేదని ధైర్యం పాట పాడింది
గొంతు గూడులో తారాడే తీపి డిస్టర్బెన్సు
బెరుకు బెరుకు పదాలు కొత్త రాగం కోసం
మెల్లగా మెత్తగా కదులుతున్నాయి
వరదలకేం వస్తాయి గాలులకేం వీస్తాయి
మట్టి యెగరిపోయి రాళ్లు బయటడతాయి
బండరాళ్ల పగుళ్ల మధ్య మృత్కణాలలోంచి
చిన్నారి విత్తనం యెదురు చూస్తోంది
అదును కోసం, వొకింత పదును కోసం
మట్టి గూటి లోని యీ పిట్ట పిల్ల యెగురుతుంది
నీలి శాఖలు బార్లా చాచి ఆకాశాన్ని పిలుస్తుంది
తన బలమైన బాహువుల మధ్య పుడకల పొత్తిళ్లు
పరిచి పిట్టపిల్లల్ని నిద్ర పెడుతుంది
యేదో మొలకెత్తబోతోంది పచ్చగా తళుకెత్తబోతోంది
వచ్చి చూద్దాం పద మనిద్దరం, మళ్లీ రేపు యిటేపు
12-10-2017

No comments:

Post a Comment