Thursday, October 26, 2017

13. యీ పద్యం లాగే...


యెవరో యెవరితోనే మాట్లాడుతున్నారు
కొన్ని అణువులు మరి కొన్ని అణువుల్తో జరుపుతున్న
సంప్రదింపులకు రాత్రి లేదు పగలు లేదు
మేఘాల్లోంచి వో నక్షత్రం పలకరిస్తోంది
కిటికీ తెరల మధ్య నుంచి కన్ను యెదురు పలకడానికి
తగిన పదాల కోసం తడుముకుంటోంది
శీతగాలి యింకా పదును దేరలేదు
కొమ్మల్లో చిక్కిన కాలాన్ని వేడిచేయాలో చల్లబరచాలో
తెలీక చెట్లు ప్రశ్నార్థకాలైపోయాయి
రెండు సంధ్యల మధ్య ఆగిన ముల్లు
రెండు దిక్కుల మధ్య జోగుతున్న నల్లని కాల సర్పం
యెలుక సగం కొరికిన రొట్టె యీ రాత్రి
కాదనను, మీరన్నది కూడా నిజమే
యిప్పుడు నేను మా వూరి టైలర్ ఖాసిం సాహెబును
దొరికిన గుడ్డతోనే చొక్కా కుడతాను
దొరక్క పోయినా కుడతాను నా పని మాత్రం ఆపను

12.34 యె యెం; 27-10-2017

No comments:

Post a Comment